पहली बार बुन्देली पर प्रयास..
----
मनाये सें एकउ ने मानी।
जे बउआ कैसी रिसानी।
*
वे उठ भुंसारे से ऐसी अकड़ गईं।
मूँजा की खटिया की पाटी पकर लई।
बउआ पे चढ़ गयीं भुमानी।
जे बउआ कैसी रिसानी।
*
कीने संदुकिया की कूची झटक लई।
कै तोये धकिया कें मोड़न पटक दई।
कि कोनउँ ने चुटैया तानी?
जे बउआ कैसी रिसानी।
*
बर जावें सबरे तोरे अटा अटारीं।
मोड़ी-मोड़न खों वे दे राई गारीं।
बब्बा खों कोसें पी पानी।
जे बउआ कैसी रिसानी।
*
मनाये सें एकउ ने मानी।
जे बउआ कैसी रिसानी।
  *हरिवल्लभ शर्मा
  दि. 30.05.2017