पहाड़ी मुक्तिका :
कीह्याँ सैर मनाइये ?
- स्वर्गीय ’साग़र’ पालमपुरी
मँघयाइया दा ऐ जोर कीह्याँ सैर मनाइये ?
जीणे दा ऐ क्या धोर कीह्याँ सैर मनाइये ?
जे मैह्ल बणे म्हारिआ मिह्णती ने तिह्नाँ च
आई बस्से कोई होर कीह्याँ सैर मनाइये ?
कुथु खेह्लिये हण खोड़ाँ, कीह्याँ गाइये छंझोटी?
रुत ऐ बड़ी मुँह्जोर कीह्याँ सैर मनाइये ?
अपणेयाँ इ कुलाचाराँ त्यागी ने असाँ लोक
होआ दे आँ कमजोर कीह्याँ सैर मनाइये ?
सैह रूप नीं सैह रंग नीं धरियाइयाँ बणाँ दा
नचदे नईं हण मोर कीह्याँ सैर मनाइये ?
किछ लाळचाँ लोब्भाँ देह्यी ग्रेथिओ दुनियाँ
जळबाँ दी ऐ टकठोर कीह्याँ सैर मनाइये ?
दान्नाँ ब्रताँ, जगाँ दा सुफल मिल्लै बी कीह्याँ?
बस्सेया ऐ मनें चोर, कीह्याँ सैर मनाइये ?
दड़ी जाइ्ये कुथु मित्तरो! जमाने ते डरी ने
हण तोपिये कुण झोर कीह्याँ सैर मनाइये ?
लोहुए ने दीया सान्जो बलाणाँ इ न पोऐ
निह्यारा ऐ बड़ा घोर कीह्याँ सैर मनाइये ?
’साग़र’ दिखा जिस पास्से बह्दी गेह्यो न माह्णू
गोह्राँ बत्ताँ ऐ सोर कीह्याँ सैर मनाइये
कोई टिप्पणी नहीं:
एक टिप्पणी भेजें