*
धर्म की, कर्म की भूमि है भारत,
नेह निबाहिबो हिरदै को भात है.
रंगी तिरंगी पताका मनोहर-
फर-फर अम्बर में फहरात है.
चाँदी सी चमचम रेवा है करधन,
शीश मुकुट नागराज सुहात है.
पाँव पखारे 'सलिल' रत्नाकर,
रवि, ससि, तरे, शोभा बढ़ात है..
*
नीम बिराजी हैं माता भवानी,
बंसी लै कान्हा कदम्ब की छैयां.
संकर बेल के पत्र बिराजे,
तुलसी में सालिगराम रमैया.
सदा सुहागन अँगना की सोभा-
चम्पा, चमेली, जुही में जुन्हैया.
काम करे निष्काम संवरिया,
नाचे नचा जगती को नचैया..
*
बाँह उठाय कहौं सच आपु सौं,
भारत-सुत मैया गुन गाइहौं.
स्वर्ग के सुख सब हेठे हैं छलिया.
ध्याइहौं भारत भूमि को ध्याइहौं.
जोग-संजोग-बिजोग हिये धरि,
सेस सन्जीवनि सौं सरसाइहौं.
जन-गण-मन के कारण पल में-
प्रान दे प्रान को मान बढ़ाइहौं..
*
--- दिव्यनर्मदा.ब्लागस्पाट.कॉम
